Reviews

Dechreuodd diddordeb Nici mewn coginio wrth draed ei mam, a byth ers hynny mae wedi mwynhau arbrofi yn y gegin. Sefydlodd fwyty pop-yp yng Nghaernarfon rai blynyddoedd yn ôl, a hyd heddiw mae'n darparu bwydydd blasus ar gyfer digwyddiadau yn yr ardal. Hi yw un o sylfaenwyr Gŵyl Fwyd Caernarfon a Gŵyl Arall.

Mae'r llyfr coginio hwn yn gwneud defnydd o gynnyrch yn ei dymor mewn ffordd syml, flasus. Gellir gwneud nifer helaeth o'r seigiau mewn un pot a heb lawer o offer cymhleth, sy'n ddelfrydol ar gyfer myfyrwyr a theuluoedd prysur. Mae symbolau arbennig yn cael eu defnyddio i nodi lle gellir addasu'r rysáit i gydfynd â deiet gwahanol e.e. figan, diglwten, di-laeth ac ati, ac i nodi'r prydau hynny y gellir eu paratoi mewn hanner awr neu lai.

Wrth gwrs, mae yma ddanteithion tipyn llai iachus hefyd − ond mae'n rhaid cael amrywiaeth mewn bywyd, does!


Bydd PARTI i ddathlu cyhoeddi 'CEGIN', llyfr ryseitiau newydd Nici Beech, Nos Wener, Tachwedd 4ydd am 7.30 yh, yng Nghlwb Canol Dre, Caernarfon, yng nghwmni Dyl Mei. Adloniant gan Hywel Pitts a Dau Cefn.
Bydd llond y lle o ddanteithion blasus o'r llyfr i'w blasu, a chwrw lleol ar werth tu ôl i'r bar.
Croeso cynnes i bawb.
*Cyhoeddwr: Gwasg Carreg Gwalch*